ແຈ້ງການ
ເຖິງ: ພໍ່ແມ່ປະຊາຊົນ, ພະນັກງານ, ທະຫານ, ຕຳຫຼວດ, ພໍ່ຄ້າຊາວຂາຍ, ນັກທຸລະກິດ ແລະ ຜູ້ປະກອບການຕ່າງໆ ທີ່ນຳໃຊ້ເສັ້ນທາງຫຼວງແຫ່ງຊາດເລກ 8 ຊາບທົ່ວເຖິງກັນວ່າ

ເລື່ອງ: ການປິດ-ເປີດ ການສັນຈອນ ຜ່ານເສັ້ນທາງຫຼວງແຫ່ງຊາດເລກ 8 ຊວງ ກມ 42+800 ຫາ 50+800(ເຂດພູໄຮ ບ້ານຄູນຄໍາ, ເມືອງຄູນຄໍາ, ແຂວງຄໍາມ່ວນ ຫາ ບ້ານ ໜອງກອກ, ເມືອງຄໍາເກີດ ແຂວງບໍລິຄໍາໄຊ)

ຫ້ອງການ ກະຊວງໂຍທາທິການ ແລະ ຂົນສົ່ງ ຂໍຖືເປັນກຽດແຈ້ງມາຍັງທຸກພາກສ່ວນຊາບ ກ່ຽວກັບ ການ ປິດ-ເປີດ ການສັນຈອນ ຜ່ານເສັ້ນທາງຫຼວງແຫ່ງຊາດເລກ 8 ຊ່ວງ ກມ 42+800 ຫາ ກມ 50+800 (ເຂດພູໄຮ ບ້ານຄູນຄໍາ, ເມືອງຄູນຄໍາ, ແຂວງຄໍາມ່ວນ ຫາ ບ້ານໜອງກອກ, ເມືອງຄໍາເກີດ ແຂວງບໍລິຄໍາໄຊ), ຊຶ່ງປັດຈຸບັນໂຄງການຟື້ນຟູກໍ່ສ້າງ ທາງຫຼວງແຫ່ງຊາດເລກ 8 ຊ່ວງທີ່ໄດ້ຮັບຜົນກະທົບຈາກໄພພິບັດທໍາມະຊາດ ແມ່ນກໍາລັງສຸມໃສ່ວຽກກໍ່ສ້າງ ເພື່ອໃຫ້ສາມາດດໍາເນີນການຈັດຕັ້ງປະຕິບັດວຽກໄປຕາມແຜນ, ສໍາເລັດຕາມຂອບເຂດເວລາຂອງສັນຍາທີ່ກໍານົດໄວ້ ແລະ ເພື່ອຮັບປະກັນດ້ານຄວາມປອດໄພ, ຫຼີກລ້ຽງຄວາມສ່ຽງໃນການເກີດອຸບັດຕິເຫດ ຕໍ່ຜູ້ສັນຈອນຜ່ານເຂດການກໍ່ສ້າງ. ກະຊວງ ຍທຂ ຈຶ່ງແຈ້ງກໍານົດເວລາໃນການ ປິດ-ເປີດ ການສັນຈອນຜ່ານເສັ້ນທາງຫຼວງແຫ່ງຊາດເລກ 8 ຊ່ວງທີ່ກໍາລັງຟື້ນຟູກໍ່ສ້າງດັ່ງກ່າວ ດັ່ງນີ້:

1.)  ເວລາໃນການປິດການສັນຈອນເພື່ອເຮັດວຽກ:

-  ເລີ່ມຕອນເຊົ້າ 7:30 ໂມງ ຫາ 11:30 ໂມງ;

-  ຕອນບ່າຍ 13:30 ໂມງ ຫາ 17:30 ໂມງ;

-  ຕອນແລງ 19:30 ໂມງ ຫາ 23:00 ໂມງ.

2.) ເວລາໃນການເປີດການສັນຈອນ:

-  ເລີ່ມຕອນກາງຄືນ 23:00 ໂມງ ຫາ 7:30 ໂມງ;

-  ຕອນບ່າຍ 11:30 ໂມງ ຫາ 13:30 ໂມງ;

-  ຕອນແລງ 17:30 ໂມງ ຫາ 19:30 ໂມງ.

ກໍລະນີມີລົດດ່ວນຜ່ານ ເປັນຕົ້ນ ລົດຂົນສົ່ງຄົນເຈັບ, ລົດໂຮງໝໍ ຂະບວນລົດການນໍາ, ຂະບວນລົດພິເສດອື່ນໆ ແມ່ນຈະໄດ້ເປີດເສັ້ນທາງຕະຫຼອດເວລາ; ສໍາລັບວັນສິນໃຫຍ່ 15 ຄໍ່າ ແມ່ນພັກວຽກ ແລະ ເປີດການສັນຈອນຕະຫຼວດ 24 ຊົວໂມງ.

ສ່ວນສະຖານທີ່ຈອດລົດເພື່ອລໍຖ້າໃນການເດີນທາງເພື່ອໄປຜ່ານຈຸດກໍ່ສ້າງກໍານົດ ດັ່ງນີ້:

1.     ຂາໄປ ຈາກທາງແຍກ 13 ໃຕ້ ມຸ່ງໜ້າຫາ ຫຼັກຊາວ ເມືອງຄໍາເກີດ ແມ່ນສາມາດຈອດໄດ້ຢູ່ເຂດສາມແຍກທາງໄປຖໍ້າກອງລໍເຂດບ້ານຄູນແກ້ວ ແລະ ເຂດບ້ານຄູນຄໍາ ເມືອງຄູນຄໍາ, ແຂວງຄໍາມ່ວນ;

2.     ຂາກັບ ຈາກຫຼັກຊາວ ມຸ່ງໜ້າຫາ ແຍກທາງ 13 ໃຕ້ ແມ່ນສາມາດຈອດໄດ້ຢູ່ເຂດບ້ານໜອງກອກ, ເມືອງຄໍາເກີດ, ແຂວງບໍລິຄໍາໄຊ.